टवाळ

घेऊन टाक देऊन टाक देऊन टाक घेऊन टाक
चाराण्याच्या कोंबडीला बाराण्याचा मसाला लावून टाक

आयटम ला फिरवायसाठी थोडा पैशाचा झोल करून टाक
मित्राच्या गाडीत पेट्रोल भरून तिला पाणी पुरी देऊन टाक
दिसायला काळी असली तरी सेल्फीने ने गोरी करून टाक
सोनू,बाबू,बच्चा पुढे हॅशटॅग लाव आणि अपलोड करून टाक

घेऊन टाक देऊन टाक देऊन टाक घेऊन टाक
कशात नाय काय पण फाटक्यात पाय घालून टाक

मित्राच्या मॅटर मध्ये पुढच्याला कानफटात पेटवून टाक
पोलिसांनी पकडल्यावर त्याच्याकडून दोन रिटर्न घेऊन टाक
तुझ्या साठी नडलोय भावा बोलत खांद्यावर हात ठेवून टाक
उगाच पडलो लफड्यामध्ये असं मनात एकदा बोलून टाक

घेऊन टाक देऊन टाक देऊन टाक घेऊन टाक
आईच्या गावात आणि बाराच्या भावात विकून टाक

सिम कार्ड ला लिंक करायला आधार कार्ड देऊन टाक
आधार कार्ड ला लिंक करायला पॅन कार्ड पण देऊन टाक
देशाचा खरा नागरिक झालायस एकदा खात्री करून टाक 
खूप मोठं काम केलं बोलत एक दोन बिअर घेऊन टाक

घेऊन टाक देऊन टाक देऊन टाक घेऊन टाक
आईची कैची काना बरोबर मात्रा पण जोडून टाक

कट्ट्यावरच्या मित्रांना दोन चार बिझनेस प्लान सांगून टाक
टाटा बिर्ला अंबानी च्या बाजूला एक छोटी खुर्ची लावून टाक
मोठी स्वप्न बघत बघत रात्रीची झोप उडवून टाक
दिवसा उठवायला आलं कोणी लाथा तेवढ्या देऊन टाक

घेऊन टाक देऊन टाक देऊन टाक घेऊन टाक
खाया पिया कुछ नाही बोलत बाराने तू भरून टाक

मित्राच्या हळदीमध्ये दारूच्या बाटल्या वाटून टाक
दारू कमी पडली तर स्वतःच्या खिशातले पैसे टाक
करवली साठी गजरा आणि परफ्युम ब्रँडेड देऊन टाक
बॉयफ्रेंड आहे तिला कळताच फ्रेंड रिक्वेस्ट कॅन्सल करून टाक

घेऊन टाक देऊन टाक देऊन टाक घेऊन टाक
ताई माई अक्का साठी विचार पक्का करून टाक

पक्षाच्या प्रचारासाठी प्याम्पलेट शेकडो छापून टाक
तलावातल्या कमळाला हातात घेऊन बाण इंजिनावर सोडून टाक
कार्यकर्त्यावर सुद्धा काय रे करतो अशी अशी वेळ आणून टाक
विचारांच्या आचारावर संहिता तेवढी घालून टाक 

घेऊन टाक देऊन टाक देऊन टाक घेऊन टाक

----------------------------------------------

राजन गायकवाड